Postair Dune

Air a phostadh Am Màrt 17, 2014 le lasairdhubh

Joshua BudichSeallaibh air a’ phostair a cheannaich mi!  Tha mi uabhasach toilichte leis. ’S ann le Joshua Budich a tha e, postair  a chaidh a dhèanamh gu sònraichte airson taisbeanadh de dh’ealain bonntaichte air na fiolmaichean aig David Lynch.  Cheannaich mi e, ann am pàirt, a chionn ’s gu bheil an ìomhaigh car col’ach ri còmhdach ACDD le Heather Brennan, ach cuideachd, mar a sgrìobh mi roimhe, thug Dune buaidh làidir orm nuair a bha mi òg: a’ chiad leabhar a leugh mi, agus tha mi gu math measail air a’ Fiolm aig Lynch cuideachd.  Cha robh an Dune aig Lynch foirfe, ach bha e adhartach agus dàna dhan àm.  Tha fiolm eile a’ tighinn a-mach, documentary mun Dune (nach deach a dhèanamh) aig an stiùiriche dheuchainneach, Alejandro Jodorowsky.  Tha a h-uile col’as ann gum biodh an Dune aig Jodorowsky fiù ’s na bu craicte na am fear aig Lynch.  Is duilich nach faic sinn e, ach tha mi a’ dèanamh fiughair mhòr ris an documentary:

Air a phostadh ann an Ficsean-saidheans | 4 beachd(an)

Teòraidh a’ Bhraig Mhòir

Air a phostadh An Gearran 26, 2014 le lasairdhubh

Aig deireadh na cùis, chan eil ach dà sheòrsa neard ann: a’ chuid is beag orra TBBT, agus a’ chuid is gasta leotha e, agus tha mise anns an dàrna campa sin. Is fìor thoil leam TBBT. Chanadh cuid gu bheil an t-sreath a’ dèanamh tàire air neardan, ach chan eil mi a’ dol le sin idir. Mar fhianais, mholainn a’ bhideo seo le Mayim Bialik (aka Amy Farrah Fowler). Fìor shaidheantair agus sàr ghaisgeach i.

Air a phostadh ann an Uncategorized | Sgrìobh beachd

Leabhar ‘s Craic

Air a phostadh An Gearran 20, 2014 le lasairdhubh

leabhariscraicBidh an fhèis litreachais, Leabhar ’s Craic, a’ tachairt am bliadhna aig a’ Centre for Performing Arts ann an Glaschu aig 350 Sràid Sauchiehall air 22d latha dhen Mhàrt bho meadhan latha, agus bidh mi fhìn ann air dà adhbhar: sa chiad dol-a-mach, bidh mi a’ bruidhinn mu ACDD aig taisbeanadh goirid aig meadhan latha; agus an uair sin, aig 4f, thèid an leabhar ùr agam do dh’inbhich òga, Feur Buidhe an t-Samhraidh, a chur air bhog.  Ù hù!  Bidh dràma, òrain, tòrr ùghdaran agus mòran eile a’ dol air adhart air an latha, agus tha coltas gu math spòrsail air a’ phrògram.  Thigibh ann!

Air a phostadh ann an naidheachd | 2 beachd(an)

Coimpiùtar daonnan-air

Air a phostadh An Gearran 14, 2014 le lasairdhubh

Seo Ubi, coimpiùtar beag uile-làthaireach no “daonnan-air”.  Tuigidh an t-Ubi do ghuth agus nì e gnìomhan sìmplidh dhut mar chur post-d no lorg fiosrachadh air an eadar-lìon. Ach mar a tha an co-stèidhichear, Amin Abdossalami, a’ mìneachadh aig 2 mionaidean a-steach, tha rud fada nas motha na sin fainear dhaibh, drochaid eadar am bitheòlach agus an teicneòlach:

We are essentially building something like the human brain.  It is a system that will eventually understand you and augment your capabilities.

Tha iad ag amas air eanchainn innealta a bhios daonnan air agus gad chuideachadh nad bheatha.  Mar mhòran leasachaidhean dhen chineal seo, tha Ubi togarrach agus eagalach chun na h-aon ìre.  Chan eil guth anns a’ bhideo gu h-àrd air tearainteachd agus prìobhaideachd.  Dè ma gheibh an NSA rathad a-steach dha na h-innealan daonnan-air seo, gad leantainn mun cuairt do thaigh fad an latha?  Tha rud beag mu phrìobhaideachd air an duilleig Kickstarter aca, ach chaidh seo a sgrìobhadh còrr is bliadhna air ais, ro na h-aoidianan a rinn Snowden, agus mus robh fios againn cho bitheanta ’s a tha cruinneachadh dàta air an lìon.   Cha bhithinn airson fear dhe na coimpiùtairean seo a chleachdadh mus robh dearbhadh ann gun robh iad air an dèanamh gu math math dìonach agus sàbhailte.  Ach ’s e seo, coimpiùtairean mar Ubi, an ath cheum loidigeach ann an leasachadh saibeirneatach gu cinnteach, agus bidh e inntinneach faicinn dè nì iad leis.

Via laughingsquid.

Air a phostadh ann an saibeirneatachd | Sgrìobh beachd

Ficsean saidheans air buidseat beag 2

Air a phostadh Am Faoilleach 30, 2014 le lasairdhubh

O chionn ghreis, sgrìobh mi mu LUNAR, fiolm saibear-punc neo-eisimealach a thathar a’ dèanamh air buidsead meanbh, agus seo fear eile dhen aon chineal, Prospect, fiolm goirid ficsean-saidheans a thèid a mhaoineachadh le iomairt Kickstarter de luach dìreach $23K.  A Dhia, tha an trailer àlainn!  Seo na sgrìobh na riochdairean/stiùirichean mu dheidhinn:

Our goal is to capture a piece of what makes 2001, Blade Runner, and the original Star Wars so awesome: texture. PROSPECT will be real and tactile, building a robust world with custom props and costumes, rather than digital effects.

Air fianais an trailer gu h-àrd, tha e coltach gun robh iad soirbheachail.  Tha mi a’ dèanamh fiughair mhòr ris a’ fiolm shlàn.  Agus ’s ann à Seattle a tha iad; feumas gu bheil iad snog!

Via io9 agus laughingsquid.

Air a phostadh ann an Ficsean-saidheans | Sgrìobh beachd

Raidió Fáilte

Air a phostadh Am Faoilleach 13, 2014 le lasairdhubh

Bidh agallamh leam ga chraoladh air Raidió Fáilte feasgar an-diugh aig 4.  Bidh mi a’ bruidhinn ri Máirín ann an Gàidhlig na h-Alba/na h-Èireann mu dheidhinn ACDD, ficsean-saidheans agus litreachas anns a’ Ghàidhlig.  Tha Raidió Fáilte ga chraoladh air an eadar-lìon cuideachd, agus mar sin, fiù ’s mur eil sibh ann am Beul Feirst, ’s urrainn dhuibh èisteachd.  Bígí linn!

Air a phostadh ann an naidheachd | Sgrìobh beachd

Eadar-aghaidh eanchainn-coimpiùtair tùs-fosgailte

Air a phostadh An Dùbhlachd 31, 2013 le lasairdhubh

“We want to lower the barrier of entry for brain-computer interfacing enthusiasts.” Abair seantans craicte airson 2014.

Bliadhna mhath ùr dhuibh uile agus cus dhiubh!

Via Boingboing.

Air a phostadh ann an saibeirneatachd | Sgrìobh beachd

Cuilean na Nollaige

Air a phostadh An Dùbhlachd 21, 2013 le lasairdhubh

Sgeulachd na NollaigeChaidh sgeulachd leam, Cuilean na Nollaige, fhoillseachadh mar Sgeulachd na Nollaige anns an Albannach an-diugh.  ’S ann mu sheòladair-fànais a tha i, Gogull mac Ùfbain mhic Narbais an Dìthiche.  Tha Gogull bochd ann an sàr èiginn.  Air chall air planaid chèin, an t-soitheach aige briste, gun chobhair, gun bhiadh.  Tha an t-acras ga reubadh na dhà leth.  Dè fon ghrèin a dh’itheas e air a’ phlanaid neònaich seo … no cò?

Dealbh le Catrìona NicilleDhuibh.

Air a phostadh ann an Ficsean-saidheans | Sgrìobh beachd

Cùrsa leughaidh aig City Lit ann an Lunnainn

Air a phostadh An Dùbhlachd 16, 2013 le lasairdhubh

citilitThèid cùrsa leughaidh a chumail aig City Lit ann an Lunnainn, a’ cleachdadh ACDD mar bhun-theacsa a’ chùrsa.  Chan eil cus fiosrachaidh agam fhathast mun chùrsa, ach na tha air a’ chlàr-theagaisg, ach tha e dìreach sgoinneil fhaicinn gu bheil seo a’ tachairt, agus cuiridh barrachd fiosrachaidh suas an seo cho luath ’s a tha e agam.  Math fhèin!

Air a phostadh ann an naidheachd | 5 beachd(an)

Lèirmheas le Raghnall MacIlleDhuibh

Air a phostadh An Dùbhlachd 14, 2013 le lasairdhubh

albannachChaidh lèirmheas le Raghnall MacIlleDhuibh fhoillseachadh anns an Albannach Disathairne sa chaidh.  Mhol e ACDD gu mòr, ach gu mì-fhortanach, cha do nochd an lèirmheas (no gin dhe na h-uilt Ghàidhlig bho Dhisathairne sa chaidh) air an làraich-lìn aca.  Tha mi an dòchas gun nochd e a dh’aithghearr, agus ma nochdas, cuiridh mi ceangal ris.  Bha e glè mhath.

Air a phostadh ann an naidheachd | Sgrìobh beachd