Tha iad ann an clò!

Tha mi toilichte a ràdh gu bheil an nobhail ùr agam, An Luingeas Dorcha air Fàire, a-nis anns na bùithtean! Cuideachd, rinn CLÀR ath-chlò-bhualadh dhen chiad nobhail anns an t-sreath, Air Cuan Dubh Drilseach, agus tha sin ri faighinn a-nis a-rithist, às dèidh dhi a bhith bliadhnaichean a-mach à clò.

Gheibhear aig na làraichean air loidhne an seo:

Comhairle nan Leabhraichean — ACDD, ALDAF
Scottish Bookstore — ACDD, ALDAF
Waterstones — ACDD, ALDAF
Kobo (leabhar-d) — ACDD

Agus ma tha sibh ag iarraidh am moladh dhan bhùth-leabhair ionadail agaibh, tha CLÀR a’ cleachdadh Lomond Books mar sgaoileadair. Mòran taing!

Air a phostadh ann an naidheachd | Air a thagadh , , , | 2 beachd(an)

Muinntir Dhùn Èideann, abù!

Bha fìor dheagh oidhche agam ann an Dùn Èideann Diciadain aig an tachartas litreachais a chuir Ionad Gàidhlig Dhùn Èideann air dòigh. Bha an còmhradh glè inntinneach, agus na daoine an làthair ro chòir. Ceud mìle taing do bhuill an ionaid agus gu sònraichte do Wilson McLeod a bha anns a’ chathair. Tha mi fada nur comain!

Air a phostadh ann an Ficsean-saidheans, naidheachd | Air a thagadh , , , , | Sgrìobh beachd

Dùn Èideann, Diciadain, 18 an t-Samhainn

Ma tha sibh a’ fuireach faisg air Dùn Èideann, bidh mi a’ bruidhinn mun nobhail ùr agam An Luingeas Dorcha air Fàire agus ficsean-saidheans anns a’ Ghàidhlig san fharsaingeachd anns an Writing Room, Teviot Union, 13 Bristo Place, Dùn Èideann, air Diciadain, an 18mh latha dhen t-Samhain, aig 7f.

Chaidh an tachartas a chur air dòigh le Ionad Gàidhlig Dhùn Èideann, agus faodar clàradh an seo air Eventbright. Tha e an asgaidh!

Air a phostadh ann an Ficsean-saidheans, naidheachd | Air a thagadh , , , , | Sgrìobh beachd

Tinte na Farraige Duibhe air Raidió na Life

Seall seo! Ma tha Gàidhlig na h-Èireann agad, bidh Raidió na Life a’ craoladh leabhar-èisteachd dhen nobhail agam, Air Cuan Dubh Drilseach (Tinte na Farraige Duibhe), gu sreathach, a’ tòiseachadh air Dimàirt, an 3mh latha dhen t-Samhainn. Ceud mìle taing do dh’Eoin P. Ó Murchú a rinn an t-eadar-theangachadh sa chiad dol a-mach, agus an uair sin, an aithris fhèin. Abair laoch!

Air a phostadh ann an naidheachd | Air a thagadh , , , | Sgrìobh beachd

Iomall le Alistair Paul

Dh’fhoillsich Nathaniel Harrington lèirmheas smaoineachail air Iomall le Alasdair Paul anns a’ Glasgow Review of Books seachdain sa chaidh a thug e orm beachdachadh bu dòcha gum bu chòir dhomh an leabhar aige a leughadh a-rithist. Thug Alasdair còir cothrom dhomh a leughadh mar dhreach corra bhliadhna air ais mar thaic ri pìos air ficsean-saidheans Gàidhlig a bha mi a’ sgrìobhadh aig an àm. Chòrd e rium gu mòr an uair sin, agus bha mi toilichte nuair a chunnaic mi gun tàinig e a-mach an clò o chionn greis. Rinn Luath Press deagh obair air a dhealbhadh, le còmhdach àlainn. Tha e glè tharraingeach, saoilidh mi. Mar sin, tha mi a’ dol a cheannach leth-bhreac, agus tha mi a’ dèanamh fiughar ri coinneachadh ris na sgeulachdan aige a-rithist. Mholainn an lèirmheas aig Nathaniel Harrington, agus mholainn Iomall, cuideachd. Tha e uamhasach math!

Air a phostadh ann an Ficsean-saidheans | Air a thagadh , , | Sgrìobh beachd

Baile Mòr Roc!

Bha tòrr spòrs agam aig OH!CON am bliadhna ann an Steòrnabhagh. Seo a’ chiad turas a bha mi a-riamh aig a’ cho-labhairt seo, agus bha e sgoinneil. Mholainn gu mòr e. Ceud taing dhan a h-uile duine a thàinig a dh’èisteachd dhuinn!

Air a phostadh ann an naidheachd | Air a thagadh , , , , | 1 bheachd

OH!CON 2026

Ma bhios sibh faisg air Steòrnabhagh air Disathairne an treasamh latha dhen Dàmhair, tha mi a’ dol a bhith a’ bruidhinn anns an t-seisean Ghàidhlig aig OH!CON 2026. Nach tig sibh ann! Cha robh mi a-riamh aig a’ cho-labhairt seo, agus tha mi a’ dèanamh fiughair mhòr rithe. Chan eil mi buileach cinnteach fhathast dè seòrsa cruth a bhios air an t-seisean againn, ach ’s e an tiotal aige:“’S iomadh aon a mheall mi don bhrugh le binneas mo chiùil”: A’ cruthachadh sgeulachdan tuairmeasach Gàidhlig dhan 21mh linn, agus saoilidh mi gu bheil e a’ dol a bhith aibheiseach math!

Air a phostadh ann an naidheachd | Air a thagadh , , , | Sgrìobh beachd

An Luingeas Dorcha: Cainnt an t-Seòladair

Tha mi air meanbh-fhaclair dhen bhriathrachas-sheòlaidh anns an Luingeas Dorcha air Fàire a chruthachadh, agus gheibhear an seo i, ach shaoil mi gur dòcha nach dèanadh na mìneachaidhean an sin cus ciall do chuid nach eil tuilleadh is eòlach air a’ bhriathrachas-seòlaidh anns a’ Bheurla mar-thà. Mar sin, chruthaich mi an taisbeanadh shìos mar nàdar de fhaclair lèirsinneach, le dealbhan a’ sealltainn ciall nam faclan is nan abairtean, agus iad anns an òrdugh a nochdas iad anns an leabhar. Gun leig sibh fios dhomh anns na beachdan aig a’ bhonn ma tha sìon shìos mì-shoilleir. Tha mi an dòchas gu bheil e feumail!

Tùsan:

Cox, Richard A. V. 2017 Geàrr-Ghràmar na Gàidhlig. Ceann Drochaid: Clann Tuirc

Dwelly, Edward 1994 [1911] The Illustrated Gaelic-English Dictionary. Glasgow: Garm Publications

MacAulay, John 1996 Birlinn: Longships of the Hebrides. Strond: White Horse Press.

MacDonald, Rev. Fr. Allan 1972 Gaelic Words and Expressions from South Uist and Eriskay. Oxford: Oxford University Press.

MacLennan, Malcolm 1979 [1925] A Pronouncing and Etymological Dictionary of the Gaelic Language: Gaelic-English/English-Gaelic. Edinburgh: Acair/Aberdeen University Press

Mark, Colin B. D. 2003 The Gaelic-English Dictionary. London: Routledge, 2003.

McLeod, Wilson and Michael Newton.M 2019 The Highest Apple/An Ubhal as Àirde: An Anthology of Scottish Gaelic Literature. London: Francis Boutle Publishers.

Nicolson, Alexander 1881 A Collection of Gaelic Proverbs and Familiar Phrases, based on Macintosh’s collection. Edinburgh: Maclachlan and Stewart.

Thomson, Derick S. (Ed.) 1996 Alasdair Mac Mhaighstir Alasdair: Selected Poems. Edinburgh: The Scottish Academic Press for the Scottish Gaelic Texts Society.

Air a phostadh ann an corpas ficsean-saidheans | Air a thagadh , , , , , | 1 bheachd

Cymera 2026

Bha fìor dheagh àm agam aig an fhèis Cymera ann an Dùn Èideann am bliadhna. Bha mi air an àrd-ùrlar còmhla ris an ùghdar à Glaschu, Robin C.M. Duncan, is sinne a’ bruidhinn ri Màiri Kidd mu sgrìobhadh ficsean-saidheans ann am mion-chànanan na h-Alba. Ceud mìle taing do Mhàiri, do mhuinntir na fèise, agus do Chomhairle nan Leabhraichean a chuir air chois e. Mar a chì sibh anns an dealbh, bha mi fhìn is Robin air ar dòigh!

Dealbh le Màiri fhèin.

Air a phostadh ann an Ficsean-saidheans, naidheachd | Air a thagadh , , , | Sgrìobh beachd

Aig a’ chlò-bhualadair

Tha i gu bhith deiseil, is tha i mòr: 615 duilleagan! Bidh i air na sgeilpichean ro dheireadh a’ mhìosa, tha sinn an dòchas. Is nach eil an còmhdach brèagha!! Mo thaing do Phineas X Jones a tharraing an dealbh. The e dìreach sgoinneil.

Air a phostadh ann an naidheachd | Air a thagadh , , , , | 1 bheachd