FMG = Fànas tro Mheadhan na Gàidhlig

Air a phostadh An Lùnastal 18, 2014 le lasairdhubh


A+ agus ceithir rionnagan!

Air a phostadh ann an fànas | Sgrìobh beachd

Fèis-leabhair Inbhir Nis

Air a phostadh An Lùnastal 18, 2014 le lasairdhubh

invernessbookfest

Ma tha sibh gu bhith mun cuairt Inbhir Nis aig a’ cheann-seachdain seo tighinn, bidh mi fhìn a’ leughadh bho ACDD agus bho FBS aig Fèis-leabhair Inbhir Nis Disathairne aig 5f, còmhla ri Seonaidh Charity. Bidh Mark Wringe anns a’ chathair, a’ cur nan ceistean oirnn. Bidh ùghdaran a’ leughadh agus a’ bruidhinn fad an latha, bho 11 sa mhadainn gu 9 air an oidhche, uile aig Eden Court. Gun tig sibh ann!

Air a phostadh ann an naidheachd | Sgrìobh beachd

Èirigh nan robotan

Air a phostadh An Lùnastal 14, 2014 le lasairdhubh


Anns a’ bhideo sgoinneil gu h-àrd, tha CGP Grey a’ dèanamh argamaid làidir gu bheil robotan a’ tighinn airson ar n-obrach, chan ann ann an ceud bliadhna, no deich bliadhna, ach a-màireach, agus chan ann a-mhàin airson obair làimhe, ach airson obair de gach seòrsa: obair dhreuchail, obair chruthachail agus obair mhanaidsearachd. Ann an saoghal foirfe, thoireadh seo cothrom dhuinn gluasad gu eaconomaidh iar-ghainneid agus gun obair, ach tha fios againn uile nach tachair sin, an-toiseach co-dhiù. Tha an ùpraid a dh’adhbharaicheas na h-atharraichean seo a’ tighinn na deann agus cha chreid mi gu bheil luchd-poileasaidh an dùil rithe idir. Mar a tha Grey ag ràdh, chan e ficsean-saidheans a tha seo, ach fìrinn an latha an-diugh.

Via Laughingsquid. Cuideachd, tha redit ann far an tèid a’ bhideo seo a dheasbad.

Air a phostadh ann an saibeirneatachd | 2 beachd(an)

Iomall Fhèis Dhùn Èideann

Air a phostadh An t-Iuchar 22, 2014 le lasairdhubh

sanas Saltire Speak EasyMa tha sibh gu bhith ann an Dùn Èideann anns a’ chiad seachdain dhen Lùnasdal aig an Fhèis Eadar-Nàiseanta, bidh mi fhìn an sàs ann an tachartas air Iomall na Fèise a thèid a chur air dòigh le Comann Crann na h-Alba: The Saltire Speakeasy. Bidh an Speakeasy a’ tachairt thairis air ceithir oidhcheannan, le diofar dhaoine air a’ chlàr gach oidhche, agus bidh mi fhìn a’ nochdadh air oidhche Diardaoin, an 7mh latha dhen Lùnasal.  Bidh Mark Wringe anns a’ chathair, agus bidh mi a’ leughadh bho ACDD, a’ bruidhinn (sa Bheurla) mun nobhail, agus cò aig a tha fios dè eile. Chì sinn. Bidh dà chuirm anns gach oidhche, tè aig 5f agus tèile aig 7f, ach tha an talla beag agus mar sin, mholainn, ma tha sibh ag iarraidh tighinn, gun ceannaich sibh tiocaidean ro làimh. Bidh an Speakeasy ann an seòmraichean a’ Chomainn, 9 Fountain Close, teann ris an t-Sràid Àrd, agus gheibh sibh tiocaidean bho làrach-lìn a’ Chomainn no bho làrach-lìn na Fèise cuideachd.

Air an aon oidhche bidh bàrdachd le Jenny Lindsay:

Agus ceòl le Adam Hunter agus Kara Swinney bho Conservatoire Rìoghail na h-Alba.

 

Air a phostadh ann an naidheachd | 3 beachd(an)

Oi Polloi agus punc as a’ Ghàidhlig

Air a phostadh An t-Ògmhios 30, 2014 le lasairdhubh

https://soundcloud.com/culturelaser/cl-the-best-thing-to-do-was-to-start-singing-in-gaelic Seo fìor dheagh agallamh le Ruairidh bho Oi Polloi còmhla ri Billy Liar air Culture Laser is iad a-mach air punc as a’ Ghàidhlig, agus cuid dhen phoileataics mun cuairt air sèinn ann am mion-chànan fo chunnart.

Air a phostadh ann an punc | Sgrìobh beachd

Lèirmheasan air leth

Air a phostadh An t-Ògmhios 20, 2014 le lasairdhubh

good-reads-logoFhuair ACDD dà lèirmheas uabhasach taiceil an t-seachdain seo. ’S e a’ chiad lèirmheas fear le Alison Lang air Goodreads.  Sgrìobh i gun do chòrd na caractaran ann an ACDD rithe gu sònraichte:  “The best sci-fi creates a world that reflects our own, and if the characters that inhabit that world evoke our sympathies we will want to revisit it, which is what I wanted to do by the end of Air Cuan Dubh Drilseach.” Chòrd iad agus riumsa.  Nuair a chuir mi crìoch air an sgeulachd ghoirid, Luathas-teichidh, bha mi ag iarraidh cumail a’ dol a’ crochadh a-mach còmhla ri Sàl agus Rìosa, agus ’s e sin an t-adhbhar a bu mhotha gun do sgrìobh mi ACDD. Is fior toil leam Sàl agus Rìosa agus tha e a’ toirt tlachd mhòr dhomh leughadh gu bheil daoine eile titheach orra cuideachd.

imp_oSgrìobhadh an dàrna lèirmheas le Iain MacLeòid anns a’ Bottle Imp, agus e a’ beachdachadh, chan ann a-mhàin air ACDD, ach cuideachd, air a’ cheist, carson nach eil barrachd ficsean-saidheans anns a’ Ghàidhlig anns an fharsaingeachd.  Mar a sgrìobh e, “A language in danger of dying tends to inspire those who know it to contemplate all sorts of futures.”  Tha MacLeòid a’ freagairt na ceist aige fhèin leis a’ bheachd gu bheil àireamh cho beag de nobhailean ficsean-saidheans againn anns a’ Ghàidhlig air sàilleabh gu bheil an àireamh de nobhailean Gàidhlig cho beag san fharsaingeachd, agus saoilidh mi gu bheil e ceart.  Tha rudeigin gu sònraichte saorsachail mu dheidhinn sgrìobhadh agus leughadh ficsean-saidheans anns a’ Ghàidhlig agus tha mi an dòchas gum faic sinn fada a bharrachd dheth anns an àm ri teachd mar sin.

Air a phostadh ann an Ficsean-saidheans, naidheachd | 1 bheachd

Sanas airson pickup + geama PC opra-fànais = miann

Air a phostadh An t-Ògmhios 14, 2014 le lasairdhubh

Mas ann às na Stàitean no à Canada a tha sibh, bidh sibh eòlach air sanasan-rèic coltach ri seo airson pickup trucks, ach seo fear a chaidh a dhèanamh mar shanas airson geama PC opra-fànais, Star Citizen, agus tha e cuimseach math. An dèidh dha coimhead air an t-sanas seo, cò nach iarradh MISC Freelancer? Tha mise ag iaraidh fear. Chan e geamair a th’ annam idir, ach bu toil leam itealaich tro Star Citizen greis; tha a choltas àlainn. Agus nach e Neasg a tha sin aig an deireadh? Dùil gur e…

Via kotaku.com

Air a phostadh ann an Ficsean-saidheans | Sgrìobh beachd

LearnGaelic le Anndra, Coinneach is mi fhìn!

Air a phostadh An t-Ògmhios 5, 2014 le lasairdhubh

Learn-Gaelic-LogoJPEGTha seo dìreach sgoinneil. Chruthaich LearnGaelic.net leasan às a’ phìos-naidheachd a rinn BBC an Là mìos sa chaidh mun Fhèis-leabhair ann an Ulapul. Anns a’ phìos, rinn Coinneach Mac a’ Ghobhainn agallamh le Anndra Dunn agus leamsa, agus faodar èisteachd ris a’ phìos fhad ’s a leughar tar-sgrìobhadh dhen chòmhradh, agus e a’ dol bho ghlas gu dubh fhad ’s a tha sinn a’ bruidhinn, a’ comharrachadh far a bheilear anns a’ sgriobt. Faodar eadar-theangachadh Beurla dhen chòmhradh a leughadh cuideachd agus e a’ gluasad ceum air cheum ri taobh na Gàidhlig. Dìos-o, nach eil sin snasail!

Cha robh mi air coimhead air LearnGaelic.net ann an greis ach tha e soilleir gu bheil iad air mòran leasachaidh a dhèanamh air an làraich. Tha an goireas seo am measg na cuid as fheàrr a tha mi air faicinn airson ionnsachadh na Gàidhlig air loidhne. Math fhèin.

Air a phostadh ann an naidheachd | Sgrìobh beachd

Fèis Leabhair Ulapuil san Albannach

Air a phostadh An Cèitean 19, 2014 le lasairdhubh

albannachRinn David Robinson mòladh mòr air Fèis Leabhair Ulapuil ann am pìos a nochd anns an Albannach Didòmhnaich. Rachainn fhìn leis a h-uile rud a sgrìobh e mun fhèis.  Bha i sònraichte math. Cuideachd, chuirinn mo thaic-sa ris a’ mholadh a rinn e air an obair eadar-theangachaidh a rinn Mòrag Stiùbhart.  Tha cuimhne agam air a’ chiad uair a chunna mi eadar-theangachadh beò ga chleachdadh aig tachartas-leughaidh.  B’ ann an Uibhist a Deas a bha e, aig leughadh a rinn Aonghas Pàdraig Caimbeul, agus chuir e iongnadh mòr orm air cho math ’s a dh’obraich e.  Ann an sgìre dhà-chànanach, thug e cothrom dhuinn tachartas litreachais a chumail tro mheadhan na Gàidhlig, gun a bhith a’ dùnadh a-mach a’ chuid anns an sgìre aig nach robh an cànan.  Ann an Uibhist cho math ri Ulapul, ’s e cothrom àraid agus cudromach a tha sin, agus a bhios sin anns an àm ri teachd gu cinnteach.  Ach chan e obair shoirbh a th’ ann an eadar-theangachadh beò idir.  Rinn mi fhìn rud beag trèanadh ann an eadar-theangachadh beò mar phàirt dhen cheum agam aig SMO, agus dìos-o, abair gun robh e doirbh sgìtheil.  Tha spèis mhòr agam don chuid a tha comasach a dhèanamh fad uair a thìde.  Agus gu sònraichte do Mhòrag airson a bhith deònach feuchainn ri còmhradh mu shaibeir-punc a thionndadh chun na Beurla air a’ spot, leis an dà chuid droch chainnt agus faclan teignigeach an ceann a chèile.  Mar a thuirt i fhèin ri David Robinson, “F***wit tends not to be the sort of word used doing translation work for the council …”  Tha mi an dòchas nach e!

Air a phostadh ann an Ficsean-saidheans, naidheachd | 1 bheachd

Moladh mòr air Fèis Leabhair Ulapuil

Air a phostadh An Cèitean 12, 2014 le lasairdhubh

Ulapul

Bha deireadh seachdain buileach sgoinneil againn aig Fèis Leabhair Ulapuil agus chan urrainn dhomh a moladh cus.  Abair fosgladh sùile!  Cha chreid mi gun robh mi a-riamh aig fèis (chiùil, leabhair no ealain) a bha cho rianail, tlachdmhòr agus inntinneach.  Iomadh turas a bha mi ann an Ulapul, ach coltach ri mòran, dìreach gus am bàta fhaighinn a Steòrnabhagh, ach an turas seo, bha cothrom ceart agam cuairt a dhèanamh air a’ bhaile, agus thaitinn e gu mòr rium.  Dh’ionnsaich mi gu bheil fada a bharrachd ann an Ulapul na bhite an dùil is tu nad sheasamh aig a’ chidhe a’ feitheamh ri aiseag Leòdhais.   Bha an Fhèis fhèin ga cumail ann an Talla a’ Bhaile, ach chaidh ar biadhadh aig a’ Ceilidh Place shios an rathad, agus dios-o, bha am biadh math.  Bha na seiseanan uile smaoineachail, agus cuid, craicte èibhinn cuideachd.  Chòrd an seisean le A. L. Kennedy rium gu sònraichte is mi a’ gàireachdainn cho làidir ’s gun tàinig na deòir.  Fo stiùir sgilleil Mark Wringe, chaidh an seisean aig Anndra agus mi fhìn glè mhath, le mu 40 an làthair. Rinn Mòrag Stiùbhart an t-eadar-theangachadh beò, agus bha sinn buidheach às an obair a rinn i, oir, cha robh a’ Ghàidhlig aig a’ mhòr-chuid anns an èisteachd. Ceud taing dha na h-uile a thàinig cho fada gus ar faicinn! Agus moladh mòr dhan Fhèis airson tachartas Gàidhlig a chur ris a’ phrògram. B’ e fior thlachd a bh’ ann agus tha mi gu mòr an dòchas gum bi seans agam dol air ais an ath bhliadhna.

Taing do Brian Ó hEadhra airson a’ fòto.

Air a phostadh ann an naidheachd | 3 beachd(an)