Nuair a thig an latha — agus thig an latha gun teagamh — a chruthaicheas sinn beatha shaibeirneatach fhèin-mhothachail, dè na còraichean a bhios aca? An e tràillean a bhios annta neo co-ionnanaich? Seo fiolm goirid drùidhteach a-mach air a’ cheist sin.
Via boingboing.
Chuir Oi Polloi clàr ùr a-mach o chionn ghoirid, Dùisg, agus seo a’ chiad bhideo às.
Fhuair mi leth-bhreac dhen CD fhèin bho Roddy Atomgevitter seachdain sa chaidh agus tha mi air a bhith ag èisteachd ris sa chàr bhon uair sin. ’S e clàr iomadach farsaing a th’ ann. Cho math ris an Oi! as dual dhaibh, tha òrain air a’ chlàr a tha nas coltaich ri US hardcore, neo cuid eile a tha coltach ri Metalica tràth — rudeigin ann dha na h-uile. Tha e craicte math agus a’ còrdadh rium nas fheàrr le gach èisteachd. Chanainn gur e Dùisg an CD punc Gàidhlig as fheàrr a chuala mi a-riamh agus e na cheum mòr air adhart do cheòl nuadh na Gàidhlig anns an fharsaingeachd.
Via Tosgaid.
B’ urrainn dhomh uairean a chaitheamh a’ coimhead seann bhideoan de rocaidean a’ togail orra, agus am fear seo am measg na cuid as fheàrr leam, san t-seann nòs, daoine le blas deasach air an rèidio agus am faothachadh a chluinnear nan guthan nuair a thèid innse gu bheil i seachad air an tùr. Bu i an Saturn V an t-inneal a bu cumhachdaich a rinneadh le mac-an-duine a-riamh agus cuiridh e gaoir tromham fhathast ga coimhead a’ blosgadh suas dhan ghealaich. Sgoinneil.
’S e innleadair agus duine leth-shaibeirneatach a th’ ann an Steve Mann a chosgas speuclairean sònraichte coimpiùtaireach, agus is coltach gun do dh’fhuiling e eucoir-ghràin ann am Pairios nuair a bha e ag ithe le a theaghlach aig McDonalds agus air sgàth nan leasachaidhean-cuirp a th’ aige. A rèir Mann, dh’iarr luchd-obrach McDonalds gun toireadh e na speuclairean dheth fhad ’s a bha e anns an taigh-bhìdh (chan eil e soilleir carson), agus nuair a mhìnich e gun robh na speuclairean ceangailte gu buan ri a chorp, thug an luchd-obrach ionnsaidh air, a’ feuchainn ri na speuclairean a reubadh far a chinn. Gu h-ìoranta, a chionn ’s gun robh na speuclairean air agus a’ clàradh na thachair, tha dealbhan aig Mann dhen ionnsaidh air fad agus an eucoir a rinn muinntir McDonalds.
Air Cuan Dubh Drilseach 
