Dà latha air ais, dh’fhoillsich The Atlantic alt a-mach air rannsachadh a rinneadh air rionnag shònraichte, KIC 8462852, agus am beachd aig cuid gur dòcha gun do lorgadh fianais gu bheil sìobhaltas coigreach air sructaran ana-mhòr a thogail mun cuairt orra. Mhothaicheadh anns na dàta bhon phrosbaig Kepler lùghdachadh caochlaideach anns an t-solas a thig bho KIC 8462852, an aon seòrsa lùghdachaidh a chleachdar mar fhianais gu bheil planaidean mun cuairt air rionnag, ach le KIC 8462852, fada nas motha na bhiodh dùil. Tha cuid a tha ag obair air na dàta seo air cur air adhart, is dòcha, gu bheil sructaran ana-mhòr coigreach ag adhbharachadh an lùghdachaidh a chithear, sructar mar chruinne Dyson no a leithid. ’S e alt beag baoth a th’ anns an fhear anns The Atlantic, agus tha e gu math doirbh a ràdh dè cho earbsach sa tha an fhianais aig an ìre seo, ach leughar deagh dheasbad air reddit.com uime an seo agus an seo. Cha chuirinn fhìn airgead air idir, ach tha mi an dòchas gu bheil e fìor. Nam b’ fhìor, dh’atharraicheadh an naidheachd a h-uile rud.

Dealbh CC 3.0 Utente:Hill